సంస్కృత రచనలు తెలుగు లిపిలో

శ్రియః కురూణామ్ అధిపస్య పాలనీం ప్రజాసు వృత్తిం యమ్ అయుఙ్క్త వేదితుమ్ । స వర్ణిలిఙ్గీ విదితః సమాయయౌ యుధిష్ఠిరం ద్వైతవనే వనేచరః ॥ కృతప్రణామస్య మహీం మహీభుజే జితాం సపత్నేన నివేదయిష్యతః । న వివ్యథే తస్య మనో న హి ప్రియం ప్రవక్తుమ్ ఇచ్ఛన్తి మృషా హితైషిణః ॥ ద్విషాం విఘాతాయ విధాతుమ్ ఇచ్ఛతో రహస్య్ అనుజ్ఞామ్ అధిగమ్య భూభృతః । స సౌష్ఠవౌదార్యవిశేషశాలినీం వినిశ్చితార్థామ్ ఇతి వాచమ్ ఆదధే ॥ క్రియాసు యుక్తైర్ నృప చారచక్షుషో న వఞ్చనీయాః ప్రభవో ఽనుజీవిభిః । అతో ఽర్హసి క్షన్తుమ్ అసాధు సాధు వా హితం మనోహారి చ దుర్లభం వచః ॥ స కింసఖా సాధు న శాస్తి యో ఽధిపం హితాన్ న యః సంశృణుతే స కింప్రభుః । సదానుకూలేషు హి కుర్వతే రతిం నృపేష్వ్ అమాత్యేషు చ సర్వసమ్పదః ॥ నిసర్గదుర్బోధమ్ అబోధవిక్లవాః క్వ భూపతీనాం చరితం క్వ జన్తవః । తవానుభావో ఽయమ్ అబోధి యన్ మయా నిగూఢతత్త్వం నయవర్త్మ విద్విషామ్ ॥ విశఙ్కమానో భవతః పరాభవం నృపాసనస్థో ఽపి వనాధివాసినః । దురోదరచ్ఛద్మజితాం సమీహతే నయేన జేతుం జగతీం సుయోధనః ॥ తథాపి జిహ్మః స భవజ్జిగీషయా తనోతి శుభ్రం గుణసమ్పదా యశః । సమున్నయన్ భూతిమ్ అనార్యసంగమాద్ వరం విరోధో ఽపి సమం మహాత్మభిః ॥ కృతారిషడ్వర్గజయేన ...